Matteus kom gee vir ons vanoggend baie goeie raad. Hy sê in Matt 18:20 - Want waar twee of drie in my Naam vergader, daar is Ek in hul midde.
Ons almal het gebed nodig en daarom nooi ek jou uit om gebedsbehoeftes met my te deel en ek sal saam met jou bid. Ek nooi jou uit om jou gebedversoek vir my te stuur deur op die skakel https://www.geloof.live/geloof-in-aksie te kliek en jou hart oop te maak.
Baie van ons is dalk te skaam of te bang. Indien dit jy is, sit gou vir 'n oomblik stil, maak jou oë toe en luister wat God vir jou sê. Ek kan jou verseker jou vingers gaan die sleutelbord begin gebruik.
As jy dalk wil deel raak van die gebedsgroep kliek op die skakel https://www.geloof.live/gebed-in-aksie en voltooi die vorm. Die gebedsgroep sal via Whatsapp kommunikeer en alle gebed sal op die groep gedeel word.
Hoe werk gebed?
Ek het 'n vriend en hy het gevra dat ons vir hom moet bid. Aangesien hy vir 4 jaar werkloos was. Hier is sy getuienis!
Ek is nou amper 4 jaar by die huis na vroeë aftrede en was 37 jaar werksaam by ‘n bankinstelling.
Op ‘n gereelde grondslag het ek weer probeer om werk te kry maar dit is baie moeilik met huidige ekonomiese omstandighede. Groot opgewondenheid as jy op die kortlys vir ‘n weksonderhoud verskyn, maar onsuksesvol. Soms word jy moedeloos. Na talle CV’s na werwings maatskappye het ek later self CV’s by plase gaan afgee in ‘n hoop om suksesvol te wees.
Die Here was ons baie genadig (Genade onbeskryflik Groot) om finansieël die 4 jaar te oorleef. Daar was ook mense met omgee gesindheid wat behulpsaam was.
Ek het vir ons bybelstudie groep gevra om vir my te bid dat daar ‘n deurbraak sal kom vir ‘n werksgeleentheid.
‘n Week en ‘n half terug ontvang ek ‘n oproep van ‘n groep se Menslike Hulpbronne bestuurder om vir ‘n onderhoud te kom op ‘n baie kort kennisgewing (1 ½ uur). In die proses vra die finansiële beampte vir my wat ek alles gedoen het in my loopbaan. Nadat ek alles verduidelik het, sien ek die uitdrukking op die persoon se gesig. Ek wonder onmiddellik of hul gaan sê ek is oor gekwalifiseer.
Ek noem onmiddellik dat ek bereik het in die lewe wat ek wou en baie dankbaar daarvoor is. Ek dank die Here vir hierdie wonderlike reis. Ek wil asseblief net graag my maandelikse pensioen aanvul om te lewe en myself stimuleer en relvant bly. Dit sal ‘n voorreg wees. Hul sê dat hul die volgende week ons in kennis sal stel. Ek kry weer ‘n kans op ‘n tweede onderhoud waarby die eienaars teenwoordig is. Glo my dit raak uitdagend en net God kan daar wees om jou hand vas te hou. In die onderhoud van ongeveer 30 minute raak die eienaar stil vir ‘n paar sekondes en vra wat wil jy hê as vergoeding. Ek hou dit realisties en die eienaar kyk my in die oë en vra wanneer kan jy begin en bied ‘n senior posisie aan.
Dit was ongelooflik en jou lewe verander in ‘n paar minute radikaal en daar is hoop vir die toekoms. Alle eer aan God ons Vader wat Gebede verhoor het en my ‘n kans gegee het uit Genade. Ek is ewig dankbaar vir die geleentheid. Ek deel dit met U om te vertel van die krag van gebed en Ons Hemelse Vader wat vir sy kinders sorg.
Comments